美國就業報告（3月）— 繼續放緩，仍然強韌

美國三月就業報告顯示，非農業職位增長為23.6萬個，同二月嘅32.6萬比較係有明顯嘅放緩（要留意二月數字經修正後調高左，本來係31.1萬）。再睇睇下圖紅綫係三個月平均係34.5萬，就更加見到減慢嘅情況。

另一個放緩趨勢，就見於平均周薪年增長回落到4.24%，低過前一個月嘅4.6%。

下圖紅綫係六個月平均，可以見到近幾個月持續回落嘅走勢，依家增長回落去到4.65%。

步伐放慢，但就業市場明顯仍然強韌。第一點當然係失業率又回落至3.5%，同歴史低位3.4%只差一點點。

失業率回落，但同一時間個勞動參與率係繼續升緊嘅。三月嘅數字係62.6%，高過二月0.1個百分點，連升四個月。

而所謂嘅壯年勞動參與率（即係25至54歲人士）繼續留住83.1%，呢個數字正係2020年1月，疫症來襲之前嘅高水平。

報告出籠之後，美國10年債券孳息係由3.318厘升至3.382%（WSJ數字），因為市場預計下次聯儲局議息會議大有機會加多25點子，市場嘅評估都係加息與否都一半半機會。