今日歐央行議息嘅重點，就係等歐央行公佈新一輪TLTRO:
TLTRO 全名係Targeted Longer-Term Refinancing Operations，好簡單講就係一個具針對性且年期較長嘅借錢俾銀行體系嘅政策。
針對性就係指銀行可以向歐央行借貸嘅金額，同銀行向企業或居民發放嘅貸款額掛鈎。2016年3月推出嘅TLTRO II，如果借錢嘅銀行貸款予企業及居民嘅資金多過一定要求，其向歐央行支付嘅TLTRO利率最多降至央行存款利率（準確講法係Rate on Deposit Facility）嘅水平，即係-0.4厘，借歐央行嘅錢仲同時有利息收。
[咩係TLTRO？]
由於歐央行去年底完結QE政策（量化寬鬆），而基準利率已經降至零息水平，令歐央行主要嘅貨幣政策工具只有Forward Guidance（前瞻指引），即係向公眾確保至今年夏天都唔會加息。
由於區內經濟轉差，可以預期歐央行今次都會延長Forward Guidance嘅保證唔加息日期，或者2019年都唔加息。
現行嘅TLTRO II，會陸續係2020年6月開始到期。
TLTRO貸款總額約為7200億歐元，如果歐央行唔推新一輪TLTRO嘅話，就會大幅減少歐元區內嘅流動資金，對已轉弱嘅經濟未必係好事。
值得留意，意大利及西班牙嘅銀行借左56% 嘅TLTRO貸款，如果歐央行唔推新TLTRO，可能令兩國嘅銀行受到頗大嘅衝擊。
所以，今次議息會議最少會公佈推出下一輪TLTRO嘅意向，但由於貸款下年先到期，歐央行可能會較遲先公佈完整計劃詳情。
