聯儲局真係唔救得雷曼？| The Fed and Lehman Brothers

Laurence Ball教授嘅著作《The Fed and Lehman Brothers》，探討金融海嘯時一個重要迷題 – 到底聯儲局係咪真係唔可以拯救雷曼兄弟呢？

Ball教授問呢條問題，因為聯儲局係拒絕援助雷曼之後嘅一日半後，就出手援助AIG；而之後仲借錢俾摩根士丹利同高盛，但就死都唔願意借錢俾雷曼，同埋要雷曼破產。

以Ben Bernanke為首嘅一眾聯儲局官員事後一直強調，唔救雷曼係因為佢已經資不抵債，同埋雷曼無足夠抵押品用黎借錢，所以只有破產一條路。Ball教授認為呢個講法唔可信，因此搜集左大量資料去估算雷曼當時嘅資產負債水平，同埋計下雷曼有幾多可用嘅抵押品，並係兩年前寫成200多頁嘅論文《The Fed and Lehman Brothers》，而呢本書就係俾大眾睇嘅版本。

Ball嘅結論係序言已經寫左出黎，所以我都唔怕講俾大家睇。Ball計完之後，見到雷曼當時好大幾會係資產多過負債，而雷曼亦有足夠嘅抵押品作為借貸之用，就算唔可以扭轉敗局，亦可以給予雷曼足夠時間有序清盤；咁點解當日雷曼要即時破產倒閉？元凶係時任美國財長Henry Paulson⋯⋯

睇呢本書，最重要嘅唔係呢批結論，而係Ball教授嘅推論過程。係Ball教授推算雷曼股本水平，同埋解釋點解雷曼嘅抵押品足夠時，佢實際上係重新講解一次金融海嘯嘅過程；而佢嘅解述焦點，就放係相當重要嘅Repo（回購證券）市場問題之上。到底Repo市場嘅崩潰，點樣令到雷曼陷入困境？同樣重要係聯儲局可以點樣干預repo市場，理論上救得返雷曼？

睇完呢本書你就會對Repo市場及Money Market（貨幣市場）嘅重要性，有更深入嘅了解。