先前係世界盃期間同大家分享過倫敦商學院嘅Alex Edmans教授早年合著嘅研究顯示，國家隊係世界盃出局可以影響投資者情況，並令該國股市下跌。
其實Edmans呢篇研究，係行為經濟學界對情緒點樣影響行為嘅一系列研究中，較出名嘅一篇。
球賽結果對判形嘅影響
今次就同大家介紹另一篇關於球賽結果會影響情緒，進而影響行為嘅研究。
研究嘅對象，就係理論上絕對唔會受情緒左右決定嘅法官大人。
Louisiana State University （LSU）嘅學者Ozkan Eren同Naci Mocan就試用該校著名美式足球隊嘅比賽成績，睇下當地法官嘅司法判會唔會受球隊成績影響。根據兩位係論文《Emotional Judges and Unlucky Juvenile》嘅推論，LSU美足比賽成績未如理想係會令當地法官有判刑偏重嘅情況。
先要留意，LSU美式足球校隊係當地非常受歡迎，唔單只校友追捧，而係全個地區都支持；係1996年至2012年間，該隊主場平均入場人次就高達9.25萬人。
爆冷輸波 => 嚴懲年輕人
兩位學者嘅推測係如果LSU足球隊錄得爆冷賽果，好可能會令支持者賽後嘅情緒受影響，並因此影響到佢地工作上嘅決定；而為左排除其他因素，佢地嘅研究就專注係一定要有極高學歷，並且多年來在職訓練要求中立理性嘅法官作為研究對象，睇下球賽爆冷對高學歷理性人士有無影響。
結果顯示，當LSU足球隊爆冷輸波，之後一日法官對年輕犯人嘅判刑年期會較長；但另一方面，LSU爆冷贏波後，法官判刑並無統計上嘅異常。
而研究更發現，係LSU畢業嘅法官受影響較顯著；而係重要賽事爆冷輸波，判刑偏重嘅情況亦偏向更嚴重。
上述係研究結果概述，即是兩位學者嘅證據指向法官嘅判決會受球賽成績影響，亦即情緒有影響行為之能。
睇到呢類研究，重要嘅問題當然係⋯⋯兩位學者嘅論證同數據處理過程如何？
呢個係另一篇嘅題目啦，想知自己搵篇黎文黎睇下啦。
#####《Emotional Judges and Unlucky Juvenile》
