如果你係高考年代嘅經濟學生，你對Alchian-Allen效應唔會感到陌生。
正如個名所講，呢個效應係由Armen Alchian（艾智仁）同 William R Allen係佢地嘅經典教科書 《University Economics》中提出。又因為Alchian是張五常教授嘅師傅，所以Alchian-Allen效應早就放入高考課程之內。
Alchian-Allen效應探討嘅，係點解出口產品往往係較本土消費嘅高質素；Alchian-Allen效應認為個重點係運費，因為加左個定額運費之後，不同質素嘅替代品之間嘅相對價格有所改變，令消費需求改變。
正路嘅傳統例證係華盛頓蘋果，但我今次就會用早前Essential Phone配件360 cam嘅價錢做例子解釋。
話說上星期Essential 官網將360 Cam大減價，由199美元減至19美元。當我想買嘅時候，發現送黎香港嘅運費要32美元，呢個就係事件背景啦。
要用呢個例子討論Alchian-Allen效應，就要有兩個「質素」嘅替代產品，咁我就試下加入價值5美元嘅360 Cam袋；即係360 Cam單機同360 Cam 連袋兩個替代方案。
係減價之後，360 Cam單價要19美元，而360 Cam 連袋就價值24美元。然後我地加入運費32美元，即係香港人要買360 Cam單價就要51美元，而360 Cam 連袋就要約56美元。
Alchian-Allen效應就推測，香港人會較美國人更願意加5美元買埋個袋，個分析重點係要睇相對價格，即係用放棄左幾多實質產品黎計算。
係美國嘅顧客要買多個袋，個代價5美元其實相當於4分1個360 Cam（即係5/19）；係香港顧客嘅角度，買多個袋個代價5美元，其實只相當於10分1個360 Cam（即係5/51）。
根據需求定律，相對價格下降，需求量就會上升。因此，Alchian-Allen效應推測係加上運費之後，額外添加嘅「質素」相對價格較低，因此外地（即係要俾運費）嘅人傾向較願意購入較高質素嘅產品。
