GDPR其實係咩黎? 好老實，我對歐盟嘅法規唔太熟識，無能力好仔細咁解釋GDPR係咩。但我可以拎外國嘅報道，同大家睇睇GDPR大約係咩。
首先，GDPR全名係General Data Protection Regulation，係歐盟最新嘅網絡數據處理法規，並已經係2018年5月25日正式實行。
咁呢個新法規嘅基本要旨，一方面係給予用戶要求提取同刪除被採集嘅數據嘅選擇，另一方面係要提高網絡企業採集用戶數據時嘅透明度，即是企業要讓用戶明確咁了解到，邊一啲數據會被採集同埋經採集後數據會有咩用。
正因如此，法規列明企業嘅使用條款要清楚易明，普通人睇完都會有能力理解。呢個要求除左令大家嘅Email Inbox收到好多新嘅服務使用條款之餘，據WSJ嘅統計，唔少網絡服務使用條款反而因為呢個要求而長左好多。例如Twitter嘅舊使用條款大約3800字，新嘅就有8890字左右。無他嘅，要寫到係人都明，就即係唔可以用太多法律用語，變成要慢慢解釋，所以字就多左。
另外，GDPR要求企業係採集用戶數據前，須得到用戶嘅明確同意，呢個亦係大家收到好大量嘅Email之因 — 啲公司要百分百肯定你係同意佢地嘅數據採用方法。
係呢一點，一個較有趣嘅討論係當用戶唔同意企業個別嘅數據採集方式，咁又點呢？一個最受關注嘅例子就係Facebook。FB係更改用戶使用條款之後，基本上係要求用戶同意佢所有嘅數據採集行為，並無給予用戶太多選項；若用戶不同意，FB就會彈出一個選項 — Delete 左你個FB Account。
GDPR嘅規定其實列明，企業係只可以採集「真係有需要」（Necessary）的數據，並禁止企業「威迫」用戶同意其數據採集。但目前FB的立場是它為社交網絡及廣告企業，所有數據都是營運必須，所以才不給用戶拒絕的空間。
呢個就帶到GDPR的執行問題，目前我地都無法確定FB的辯解到底是否可以接受，唯一知道的方法就係告FB，由當局作出判決。亦因此，係GDPR執行嘅首日已有維權人士Max Schrems提告，指Facebook（包括旗下Instagram及Whatsapp）及Google並無作「準確的同意要求」（Informed and Specific Consent），而是以威迫的方式來要求用戶同意（Forced Consent）。
值得一提嘅係，若企業被判定違反左GDPR法規，最高嘅罰款係1000萬歐元或該企業全球收入嘅4%，以較高者為準，因此FB就要對16億美元嘅罰款，而Alphabet就要對44億美元罰款。
正因為法規阻嚇性高，唔少企業係無把握可以完全符合GDPR嘅要求時，都決定先暫時停止對歐洲居民提供服務，其中一個例子係Instapaper。
而係5月25日，多份美國報章嘅網站亦都出現暫停向歐洲用戶提供服務嘅訊息。
US newspaper websites blocked in EU after missing GDPR deadline https://t.co/Ft7c1drJEW pic.twitter.com/zgwW5YCZbf
— euronews (@euronews) May 25, 2018
可以見到，GDPR嘅實際執行其實先係最有趣嘅地方，到底FB會唔會被判定違規？啲中小企會用咩方法確自己唔會犯規？會唔會有更多企業拒絕向歐洲提供服務？呢啲都要睇歐盟實際上會點執法，先會有更明確答案。
