作為曼聯迷加上「財經記者」，眼見球隊的聯賽排名用iPhone 5s都睇唔到之際，當然要問下「全能的」投資市場，曼聯前景到底會點。
輸俾西布朗，在第6輪賽事就吃下第3場敗仗，成為近24年來最差的開季成績，聯賽排名更跌落12位，這些前所未見（至少我睇波以來都未見過，我咁後生～）的情況到底會如何反映在曼聯的股價上，要今晚先知（希望到時我有時間update下大家），不過我地可以睇番之前兩場輸波後的股價表現，以前事作鑑。
今季首場財仗出現係9月1日，當日曼聯輸左俾利物浦0-1。輸之前個日（即8月30日），曼聯股價係16.86美元。到9月3日復市，曼聯最低跌過去16.76美元，收市報16.84美元，只係跌左0.1%，可以話係無反應。的確，輸一場半場無咩大不了～
到左9月22日，今次就到左俾同市對手曼城大炒1-4，曼聯踢得幾差唔洗我再多講 (上網一Search就大把)，而呢場波亦開始令投資者憂心啦。賽前（9月20日），曼聯股價係17.55美元。23日復市，曼聯收報17.3美元，足足跌左1.4%，跌幅勁過上次！無他的，明眼人都覺得莫耶斯真係見晒底，輸埋西布朗呢場，重點叫人有信心，所以今晚股價都係跌嘅多。
曼聯迷係咪應該好擔心，係股價的表現看來，反而唔覺得要太擔心。你睇下，由輸俾利物浦之後，到對曼城之前，曼聯股價係升左4.21%的。而係曼城個場之後，股價一樣有反彈，至上星期五彈左1.79%。因為戰績好反彈？可能啦，不過我話係有個對股價不明朗因素有機會消除帶動就真。
我講緊就係莫耶斯呢個不明朗因素啦！事實上市場從不看好佢會為曼聯帶來好成績，公布佢上任曼聯個日股價就曾一度跌5%。到左今日，累績跌幅都重有成4.5%（上圖）。咁點解佢帶曼聯輸得多左，股價水平反而升左？我相信同呢個賠率愈來愈低有關。
依家莫耶斯成為下個被炒的英超領隊的賠率最低只有14倍，睇黎重會愈來愈低。係咁嘅前題下，曼聯股價今晚就算係跌，好快會重上升軌的！曼迷唔好太擔心啦。
(遊戲文章，唔好太認真，更唔好當係投資建議！）
