加拿大同墨西哥先後喺周一公佈同美國達成協議，關稅會延遲一個月先執行。不過，點解美國只係對加拿大嘅能源抽10%而非25%關稅都仍然係一個有趣嘅課題。
簡單嘅答案係因為美國煉油業傳統上使用同發展嘅係煉重油嘅技術，但近年由頁岩採出嘅原油係太輕，唔適合呢類煉油廠用，所以整個美國油業就採用一個同加拿大分工合作嘅取態，由加國（特別係Alberta）入口重油去繼續善用現有嘅煉油基建，而美國本土採出嘅輕油就作出口賺錢之用，因而出現美國作為能源淨出口國都會「依賴」加國原油呢個「怪現象」。
亦因此，美國唔願意向能源都收25%關稅。因為喺呢個行業，短期內關稅應該好大部份會直轉嫁去能源消費者，即普羅大眾。
我好推介大家睇下Sky News Economics Editor Ed Conway寫嘅呢篇解說，入面好精簡咁解釋左呢個只係一個近十至二十年嘅情況，而同時美國短期內其他重油入口地嘅選擇不多，最明顯嘅選擇就要係「敵國」委內瑞拉同俄羅斯。但老實，今時今日邊個先係美國嘅敵人，邊個知。
