上個周未講嘅係加拿大央行減唔減半厘嘅問題。結果相信大家都知道，就係真係減左半厘，將政策目標利率降至3.75厘。美國同加拿大息差，減完半厘之後個距離係多過一厘。
加拿大央行打算繼續減息嘅意向明顯，不過暫時市場估下次12月11日嘅會期只係減返四分一厘。另外，行長Tiff Macklem星期五喺IMF年會見記者時，再次強調呢個息差仲有空間繼續擴大:
There are limits to how big that difference can be, but we’re not close to those limits, and those limits are not factoring into our current policy decisions.”
不過，一個有趣嘅情況係，同美國一樣，加拿大減完半厘息之後個長綫利率係微微升返上去嘅。係因為長綫利率始終難逃美國國債孳息嘅引力，要跟住佢一齊升返上去呢？ 我諗睇多排就會有答案。
貨幣政策報告入面嘅經濟前景展望，其實同之前講嘅都差唔多，就係央行覺得減息會係一個magic bullet ，可以令人均消費增長同埋商業投資，令加拿大經濟明年下半年開始消化可以到所謂嘅「過量供應」（excess supply）。
要記住，加國人均GDP增長率去到今年第二季已經係講緊連續五季見負，再加埋下半年兩季嘅負增長預期，就一共連跌七季。不過加央行重申之前嘅睇法，2025年第一季我地就可以見到人均GDP正增長，仲要之後一直保持到正數。
喺上圖我地見到，人口增長（藍色）過去兩年都係推動經濟增長嘅主要動力，好多時都抵銷左人均GDP下跌嘅影響，亦可以喺可見嘅未來繼續推動經濟。
不過，相信各位係新聞都睇到話今個星期加國政府宣佈左會係未來三年減少批出永久居民資格嘅數量，未來兩年嘅永居批出目標都要減超過兩成。Macklem 其實係星期五都有回應呢個新政策，指加央行正在消化呢個政策改變，並認為應該主要影響佢地嘅經濟增長預測，通脹嘅影響應該唔大。
If population growth comes down faster than we have assumed, headline GDP growth will be lower
講返貨幣政策對加國嘅經濟影響，雖然加央行維持2025年人均經濟增長會返黎嘅睇法，但其實佢都見到依家個經濟明顯處於一個困局。例如，佢係預測人均消費喺剛過去嘅第三季都仍然係見負嘅。
不過︳其實第三季季個零售銷售數據其實一啲都唔差，7月按月升近0.9%，8月就出左係0.4%，而9月嘅預估初值都係0.4%，同今年首兩季都出現負增長比較係好大嘅進步。不過始終講緊每個月加國15歲以上人口都仲係大約每個月有0.3%嘅增長（而計GDP的話係講實質消費增長，唔係上述嘅名義增長），所以計人均仍然好大挑戰。
另外，分析都指出8月嘅零售數據只係表面好睇，因為扣除汽車同燃油銷售嘅所謂核心零售，係按月跌0.4%嘅，消費需求仍未見全面轉強。
呢個就係我對於加拿大央行嘅估算好感興趣嘅地方。因為佢地好相信減息係可以好快喺下年就推動到消費需求回升，解決經濟需求偏弱嘅問題。點解減息可以刺激經濟？因為息率低啲，啲人按揭續期時嘅利息開支上脹壓力就細低，希望可以令大家多啲「閒錢」拎出黎消費。
我其實就對呢個估算唔太有信心。特別係我見到個貨幣政策報入面提到，加拿大嘅家庭儲蓄率近幾季一路上升，估計去到第三季會升至8%。
呢個儲蓄率睇嘅係期內加國人disposable income入面，有幾多錢係無用到留左係度。換言之，即係收入仍然有上升嘅同時，大家唔係好願意增加消費。係咪消對經濟前景唔樂觀所以洗沙啲？ 咁係咪真係代表減息令市道好左，大家會反而有多餘錢洗多啲？ 我唔知道，但拭目以待。
