伊朗嘅200萬美元Hormuz海峽「買路錢」制度

最後更新日： 2026年03月25日

今日好幾個報道都引述無開名嘅海運相關人士報道指，伊朗有一個買路錢制度，部份受困於Hormuz（荷莫茲）海峽嘅船隻，支付高達200萬美元去確保可以「一路順風」。

• Bloomberg嘅報道指，目前呢個「保護費」安排其實仲未係好制度化嘅；一啲細節例如用咩貨幣俾錢等都係唔太清晰，支付安排亦要盡量低調，而且邊啲船可以有資格俾錢「過路」都係睇伊朗方面嘅決定。
• Argus Media 亦引述伊朗官員指，設立呢個200萬「買路錢」係因為「打仗要用錢」；報道亦講到，無人知呢200萬包嘅係單程定來回航運。

其實早喺22號，伊朗嘅議員Alaeddin Boroujerdi喺當地電視台公開講過話「伊朗有權收取200萬美元」，似係證實有呢個安排。

• 之後好快伊朗駐印度大使就出左個X推文話呢個只係議員嘅個人意見，非官方立場。

而FT今日亦報道指，伊朗向International Maritime Organization呢個聯合國海運安全組織發信，指「非敵對船隻」（non-hostile vessels）係可以喺伊朗當局安排下安全通過Hormuz海峽。

• 不過信中都講明美國同以色列，及其他有份侵襲伊朗嘅國家相關船隻就免問啦，因為佢地唔會保障呢啲船可以「出入平安」。
• 而FT嘅報道都有提到有船隻俾左200萬買路錢。