英國預算案背後經濟預測所帶黎嘅一連串問題

OBR（Office for Budget Responsibility，預算責任辦公室）喺今次英國預算案相當「出位」，本來佢嘅經濟及財政預測已經係焦點所在，但佢都仲要提早流出份預算案分析，令市場喺財相李韻晴（Rachel Reeves）未公佈預算案之前就可以知道啲政策內容。

但喺預算案完左之後，OBR再下一城，係要對公眾壓力之下公佈左一個財政預測時間表，詳列佢地喺預算案公佈之前，喺幾時同財相講左大約有幾多政府仲有幾多財政空間，然後呢兩日就出現財相係咁要出黎拆，重申自己無誇大財政問題。

花左啲時間睇過呢份OBR報告，我會話工黨政府只係使出左一記「大腳清波」，但不論預算案前定後，英國財政喺呢個情況下都仲係難睇。

預算案前生產力減、經濟差 但稅收仍升

首先要講預算案之前吹左一段時間嘅「生產力走勢估算」下調，會「盡耗」政府原有嘅財政空間。

呢個改變確實有出現左，並令到財政空間大減160億英鎊，同之前嘅傳媒吹嘅風一致；但有趣嘅情況係，傳媒傳左咁耐生產力預測嘅改變嘅重大打擊，但佢地唔太知嘅係同時個經濟預測有其他轉變，可以大幅舒緩財政空間收縮嘅問題。

財政空間無隨生產力問題而收縮嘅原因好簡單，就係稅收多左。但點解稅收會多左呢？

當個長遠生產力走勢轉差之後，其實GDP增長都會隨之而轉弱，而事實上OBR都估算至到2029-30年度，英國嘅名義GDP增長會較之前嘅估算有所下跌嘅。（名義）GDP跌咪即係（國民）收入會下跌？稅收點解反而可以升？

OBR估計個國民收收入嘅分開勞工收同企業收入計嘅話，未來呢幾年係勞工收入升而企業收入大跌；而因為企業收入嘅跌幅將會係2027-28年開始大過勞動收入嘅增幅，整體而言就拖累名義GDP下跌。又由於勞動收入嘅稅率係遠較企業稅率為高，所以喺呢個情況下，政府整體係可以收到更多稅。

點解OBR對勞動收入咁有信心？你見到我地呢度講緊名義收入，即係有計通脹。目前英國通脹無法回歸英倫銀行2%嘅目標，所以OBR將通脹估算調高，再加上近年嘅薪酬增長速度亦較OBR估計為高，令要貨稅嘅名義勞動收入預測被調高。

咁總結一下呢個OBR經濟前景基礎預測，就係：

• 經濟中綫生產力差左
• 實質GDP差左
• 名義GDP都低左
• 企業收入都差左
• 但因為勞工收入隨通脹帶動下上升，所以勞工俾嘅稅又多左，令政府唔需要處理咁大個「財政黑洞」…… 呢個畫面，其實一啲都唔好睇。

點解事前要吹到個財政情況咁差？

當然，個財政情況「無政府之前吹到講咁差」，但個財政空間仍然係細左。上面講到個生產力問題令會「食」左160億鎊嘅財政空間，即係個會變成「財政負空間」，但經濟預測嘅修訂成功將個空間變返正數42億鎊。（見下圖左）

咁依家嘅一個重點討論就係，「喂～你咩都未做都仲有個正數估咩吹到財攻大難咁。」

根據OBR上星期五嘅公佈，政府喺10月31日就已經知道個預算案前係仲有42億鎊嘅財政空間。

呢個討論係有關工黨政府點樣透過放風黎控制市場公眾預期嘅問題。例如，FT係第一個講生產力下調嘅財政打擊，佢出刊嘅日期就已經係10月27日，即係政府已經知道個財政空間唔係負架啦。政府去到11月14日先再吹風話唔會加薪俸稅；而就算如此，政府嘅訊息都係財政惡化所以要大幅加稅。

「加稅」放在下次大選之後

而結果預算案亦都真係加左稅，只係方法改為凍結稅階再多三年；上屆政府未身已經將稅率凍到去2028-29年度，所以依家個凍結稅階嘅「加稅」效果，會主要喺2029-30年度出現。

同上面嘅討論相似，通脹本質就係會帶動名義薪酬上升，咁凍結應用喺稅階嘅直接效應就係藉通脹令更多人要交稅或者交更高嘅稅率，令薪俸稅收大增。但因為工黨只係延長凍結期，所以主要嘅加稅就剛剛好放係計算財政空間最重要嘅2029-30年度；而事實上，下一次大選期最遲會係2029年中，故此甚至可以話係將個加稅嘅冲擊一腳踢左下一屆政府。

帶返去預算案前嘅吹風問題，佢地事前將經濟前景描述到極壞，並吹定要加薪俸稅述，再黎個u-turn唔加，絕對係好差嘅政策討論管理。用返上面OBR提供嘅時間表，根本無需要刻意講到財政空間嘅變負嘅問題。當然，42億鎊嘅財政空間根本未如理想，而加稅係必須，但點解個溝通要做成咁，真係好令人迷惑。

不過真正嘅問題係，本身個預算案前嘅財政空間已經係由「經濟惡化下加重薪俸稅負擔」黎「保護」，工黨政府依家只係將個波踢到去2030年，但個解決方法都係「進一步加重薪俸稅負擔」—— 呢個策略先係我覺得預算案最大嘅問題。