PPI 同關稅之間嘅關係

7月份嘅PPI我其實覺得好有趣，其中一個有趣嘅原因係美國傳媒都有時似係對現時BLS（勞工統計局）嘅PPI編制方法唔太理解，例如之前講過佢地錯誤地堅持PPI係「批發物價」（Wholesale prices）嘅指數；呢啲誤解有時會令佢地對數據嘅解讀有偏差，特別係當數據好搶眼嘅時間。

7月PPI嘅數字就相當搶眼，PPI-Final Demand 就按月錄得0.9%先幅，仲帶到按年升幅急升至3.3%。

通脹數字一高，我地就即刻大叫「關稅！」 本能黎嘅，例如我首先都係咁諗。

例如最搶眼嘅一個細項，係新鮮蔬菜及乾菜（Fresh and Dry Vegetables），一個月升左38.9%，吸引到唔少傳媒報道。（其實去BLS網站睇細項，可以見到只係新鮮蔬菜帶動嘅升幅，一個月升左50%，但新聞就係睇新聞稿寫，快好多啊。）

但如果話關稅令入口價格高左，所以蔬菜嘅PPI急升就要小心啲啦，因為要首先記住一個重點，就係PPI係唔計入口嘅。

PPI就係用黎量度本土生產商賣出產品服務時所收取嘅價格（所以叫做Producer Price Index，計Producers收嘅prices；呢個概念遠遠準確同有用過咩批發價格），所以只計本土製造嘅野嘅價錢，入口價格係唔會直接計入嘅。

因此，係唔可以直接話因為關稅令入口蔬菜價格上蔬菜嘅PPI-FD，似係一個相對較難入口半成品再加少少工就賣嘅一個產品，入口價格嘅直接影響。

咁仲可唔可以用關稅黎解釋呢？

咁當然都可以。例如我就問左BLS，佢地PPI部門嘅經濟師就話，雖然PPI唔直接計入口價格，但理論上本土價格都會因為入口價格隨關稅上升，因為本土生產商喺入口商品價格上升嘅前提下，提高價格而無損競爭力嘅空間理論上大左，跟隨加價嘅機會亦上升左。呢個係BLS對關稅同PPI關係嘅一個主要睇法，喺佢地嘅FAQ都可以見到。

咁當然，關稅令生產者收取嘅價格上升另一個可能性，就係入口成本上升。呢個解釋比較簡單易明，原材料貴左，咁就有動力轉嫁成本俾買家。如果入口嘅原材料，之後生產商將件產品加會價，呢個種價格上升PPI係計嘅。

另一個可以睇到關稅轉嫁效果嘅PPI-FD數字，就係所謂嘅trade services（交易服務）。PPI計所謂嘅交易服務，就係零售商同批發商人「提供服務時收錢」；咁即係咩？就係批發同零售商所收到嘅利潤（Margins）。

係呢個margins計嘅就係買入件貨物再賣出中間所賺嘅差價。當一個零售商入口一件產品（當係一件衫啦），呢件衫如果個入口總值因為有關稅而高左，而如果個零售價又不變嘅話，咁個利潤就會細左；但如果隨著關稅增加而加價，理論上會見到嘅就係利潤不變甚至上升。

而喺7月份報告就係見到呢類利潤上升，例如用Final Demand Trade Services 呢個總類睇，按有2%嘅升幅。

其實你再分開啲細項，例如汽車零售就有4.8%嘅按月升幅、電視及影視設備零售都見到按月3.8%嘅升幅；機械及車輛批發就見到有6.7%升幅、食品及酒精飲品批發都升左6.7%（呢個就真係批發價格啦）。

當然，呢啲批發零售利潤用一個月睇係比較波動嘅，有唔少升得多嘅上一個月都見負嘅；同時亦唔係話所有行業都受關稅影響咁大嘅，呢個需要進一步分析。但作為一個整體論說，話零售批發商好願意將成本轉嫁予消費者（再重申，唔一定係個人消費，亦可以係企業或政府甚至出口）。