美國3月耐用品訂單按月升9.2%，大幅高過市場預期嘅2%，一個反射嘅估計就係啲人趕住想喺4月關稅之前落左order先。不過由於我地講緊嘅係新訂單數字（New Orders），而唔係銷售數字 （Shipments），前者通常係講唔會即時出貨嘅產品，所以同關稅預期嘅關係未必咁直綫。
如果將數據分類去睇，就見到扣除交通設備之後個耐用品訂單係基本無升過。咁即係嗰266億美元嘅訂單增幅全數黎自交通設備，而交通設備按月計見到27%有多嘅升幅。
交通設備嘅係汽車啦？ 3月見到嘅汽車及零件嘅訂單增長按月計雖然有2.3%增長，但實數只係14億美元左右，同上面講嘅266億仲差好遠。
其實絕大多數嘅升幅都係黎自非軍用飛機及零件，按月多左259.7億美元訂單，增幅就高達139%。
咁美國有幾多間飛機生產商啊，各大傳媒馬上指出波音喺3月收左192架飛機嘅訂單，相信就係呢個非軍用飛機及零件幅幅嘅主要來源。
問題就係，呢192架飛機，係包括50架由中銀航空租賃買嘅737MAX。
近日嘅新聞就係中國下令各航空公司拒收波音嘅飛機，而波音CEO Kelly Ortberg喺星期三就於業績後分析員會議講左中國嘅商戶已經表明唔會接收新飛機，而路透報道亦引述Flightradar24嘅數據指最少有三間新機由中國送回美國。
到底呢50架737MAX會唔會取消訂單呢？ 按美國Census嘅統計方法，取消嘅訂單係會於未來嘅耐用品訂單入面扣返，所以非軍用飛機及零件呢個細項不時會出現負數；只係唔知今次會唔會有咁嘅情況出現。
