上個星期美國同英國都係同一條新聞 — 腰（Yield)。 英國嘅三十年期國債孳息星期二升到去5.221%，為自1998年8月以黎嘅高位。同日就出現英國Debt Management Office賣30年債錄得票面息率5.198%，都係1998年以黎新高。
因為有Lizz Truss 喺2022年嘅前車可鑑，國債孳息抽升同時英鎊下跌成為政治大問題。其中一點就係高息會令政府利息開支上升，咁就會令現屆工黨喺上次預算案好重視嘅fiscal headroom — 即係去到2029-30達到財政平衡嘅同時，政府仲有幾多空間可以洗錢。無晒headroom就會可能迫使工黨政府削政府開支或甚至加稅，咁就進一步破壞佢嘅選舉承諾。
十月時，Office of Budget Responsibility （OBR）計過，現時嘅財政計劃估算嘅話去到2029-30年度可以達經常性開支同稅收平衡之餘，仲有99億鎊嘅空間。
- 其中一個比較多人引述嘅，係Capital Economics嘅經濟師Ruth Gregory嘅講法。至周二嘅升幅已經令個headroom已經因為還債開支上升而少左89億鎊，計算上只要20年期英國國債升較當日水平升多0.06厘就會「耗盡」。
- 又或者我地睇返OBR十月時嘅提供嘅模型反應數據：如果國債利率利率每較佢嘅估算基礎高1厘，去到2029-30年度利息開支就會升120億鎊；而當英倫銀行嘅基準利率每高1厘，利率開支則會升47億鎊。兩者加埋，就即係167億鎊，仲大過成個headroom。
- 咁當時個估算基礎係咩呢？ 就係加權平均之後嘅國債利率為4.1厘，而英倫銀行嘅基準利率則為4.9厘。我做唔到個加權平均，但如果用10年孳息個參考，10月30日時為4.327厘，而去到上星期四就升到4.799厘，升左大約0.47厘。如果個平均都係咁嘅升幅，利息開支就大約已經多左60億鎊（非常粗略咁直綫諗）。
要記住，呢個fiscal headroom嘅「遊戲」，個重點只係OBR點估計（因為你點知未來嘅預算案係點？連到時邊個黨做都唔知啦）。OBR話你無空間，政府就要面對壓力，要去處理。周六財相Reeves 係中國外訪時仍然強調，政府重視之前訂下嘅fiscal rule（財政原則），亦聲言佢嘅預算案係為一整個財年而訂，即無意喺三月OBR發佈新嘅財政預測更新時，推新嘅財政政策云云。
當然啦，英國有無可能解決到呢個利率抽升嘅困局？我俾呢個圖你睇：
睇開嘅讀者會知，我會將呢種情況形容為英國利率「無法避免美國息率嘅引力而跟住上升」。重要嘅一點係，英國對美國孳息嘅正息差大約自8月開始出現，反映嘅係美國比較進取嘅減息預期。依家市場對美國減息嘅前景無咁樂觀，兩者嘅差距近期都已經明顯收縮，呢個就係我所講美息同美元上升先似係今次嘅元凶。
當美國職位空缺多左會令息升，失業率跌同非農增長好過預期又再令個息升多啲，我係唔相信英國單方面有能力處理今次嘅升勢。你問我擔唔擔心，我就會話離3月底仲有一段時間，好多野可以發生，真係仲有空間唔好太早擔心。話唔定到時Elon Musk做埋英國首相呢，依家個世界變得咁快。
— 原刊於本網Patreon，題為《講下英國條腰（Yield）嘅問題》 —
