Fast Fashion、孟加拉、新興市場

係FT嘅文章《Can fast fashion’s $2.5tn supply chain be stitched back together?》讀到,有啲一向為Fast Fashion品牌車衫嘅孟加拉廠房,係武漢肺炎疫情下收到啲名牌嘅訊息,內容大概係「我地暫時唔會要你車好嘅衫,而你造完送左黎嘅貨,我地亦都唔會找返條數俾你」。

無錯,係送左嘅貨都會唔找數。點解? 因為佢地可以。 廠方係報道入面都講明,佢唔會告呢啲時裝品牌,一來訴訟費貴,二來廠方唔想成為行內唯一告啲時裝品牌嘅嗰間廠,「我仲想將來有生意做啊」。

送左嘅貨都會收唔到錢,其實係呢個疫情下,新興市場都可以幾傷下。孟加拉嘅報章《The Daily Star》上星期就報道,好快該國就會向IMF申請大約七億美元嘅貸款。

係全球疫情下,IMF有幾個工具可以係無經濟改革要求下借錢俾有需要嘅國家。IMF會批出SDR(Speacial Drawing Rights),然後啲國家就可以拎去換有儲備價值嘅貨幣,依家一美元大概等於0.73個SDR。

除左問IMF借之外,新興市場就只有出售外匯儲備呢個選擇去換取美元,因為央行貨幣互換協議就無佢地份,用FIMA Repo 就要首先持有美國國債。之前WSJ嘅報道就指出,十二個較大嘅新興市場合共係三月減持1435億美元嘅外匯儲備。

美國財政部嘅數字就見唔到有孟加拉持有嘅數據,而據孟加拉央行數字顯示,截至二月該國有大約330億美元外匯儲備,唔知賣左幾去到依家減少左幾多呢?

登記本網Newsletter,就可以不定期收到專業嘅經濟學術及經濟時事討論