之前寫過一篇文討論《5G Plan講緊幾錢》，入面引述 WSJ嘅專題講5G Plan 嘅商業考量同4G 可能 大不同，所以收費未必會貴過4G 現行嘅收費。
……流動電訊商用幾百億更新電訊設備，先可以建設5G網絡，唔收貴啲點賺返啲成本？其實係專題嘅另一篇文就講解，5G唔再只用喺流動電話網絡，好重要嘅進步係「Internet of Things」嘅應用，即係好多家居、交通及工業設備都可以用到5G……
……呢類嘅商業應用，將會係5G服務供應商嘅重要收入來源，分擔消費者要「貢獻」嘅費用。報道訪問嘅學者認為，5G網絡服務會因為多用途應用，整個經濟生態同現有4G嘅唔再一樣。例如工業應用嘅收費，可能係同設備掛勾而唔只係依家流動數據咁按量收費，5G服務商可能會將數據用設備綁埋一齊賣，盈利方式更多元。
不過呢個只係長綫嘅商業估算，短期黎講5G 可能仲要一段時間先發展至上述嘅普及商業及消費者應用規模。所以 「5G Plan 講緊幾錢」呢個問題，係短綫而言應該有另一個答案。
可幸嘅係，美國嘅 Verizon 同南韓嘅幾大電訊商上星期先後公佈消費者用嘅5G計劃，並公佈收費詳情。
- Verizon 現行無限上網嘅4G 用戶，只要加每月10美元就可以使用5G 計劃（頭三個月仲免費）。
- 不過，由於美國未有三星嘅5G 版Galaxy S10，用戶要用 Motaloln 嘅 Moto Z3另加一個外置 modem 先用到，初期亦只會有芝加哥同 Minneapolis 兩個城市有覆蓋。
- SK Telecom 就推出4款計劃：8GB 就要5.5萬won（約380港元）、150 GB 就7.5萬won（約520港元）、200 GB就9.5萬won（約660港元）、300 GB 就12.5萬won（860港元）。（而係6月底前登記，最貴兩個plan仲會變成無限數據至今年底）
- LG Plus 則有3款計劃：9GB每月5.5萬 won（約380港元）、150 GB 就7.5萬won（約520港元）、 250 GB就9.5萬 won（約660港元）。
- KT嘅3款計劃全部都係無限數據，分別係限速水平：最平係8萬Won，限速係100kbps；之後分別係10萬won及13萬won，最高限速係3Mbps。
可以見到，數據量遠較現行嘅4G Plan為高，但月費都唔係較4G Plan高極多，而可以預期長綫收費有下調空間。不過要記住，外國嘅收費唔反映本港嘅收費，唔好預期香港將來5G Plan一定會好似南韓嘅咁平。
