報道指,Apple正同美國多間傳媒機構商討合作,打算推出所謂嘅「Netflix for News」服務,用戶可以俾一個月費就可以無限制任睇所有參與計劃嘅報章雜誌內容。問題係,Apple計劃會先從所有月費收入抽50%佣,餘下另外一半先按比例分發俾各大傳媒機構,New York Times及Washington Post已經對此表示反感。

有咩理由Apple覺得可以係「Netflix for News」度抽一半佣?

有理由架,Recode嘅Peter Kafka寫左篇文解釋

當大家用Apple平時係App Store抽15或30%佣作比較,50%當然係高到離譜。但Kafka指,唔少雜誌社其實已經同Apple達成協議,願意俾個50%年佣金。

原因簡單,係個大啲市場入面收少啲,好過係個細市場收貴啲。唔少雜誌社都相信Apple News可以為佢地帶黎大量新嘅讀者,所以貴貴都願意俾。

同時,要記得Apple呢個新項目係建基於去年收購嘅Texture。Texture本身同傳媒嘅分成協議,都係分得50%收入。

另外,Apple嘅協議係容許傳媒係文章內賣廣告,傳媒可以保留100%廣告收入。

當然,問題係幾份大報如NYT同WaPo等,近年好成功建立自家訂戶網絡,加入Apple News嘅作用未必咁大,仲可能蠶食現有嘅訂戶收入,所以唔願意加入。

訂享經濟,始終唔只係內容重要,係咪擁有一個自己掌握到嘅社群,亦係生存最關鍵一環。

登記本網Newsletter,就可以不定期收到專業嘅經濟學術及經濟時事討論