係上一個金融危機大家學識左咩係CDO（Collateralized Debt Obligations）同MBS（Mortgage Backed Securities），而迎接下一個金融危機我地要學嘅係CLO（Collateralized Loan Obligations）同Leveraged Loans。
最近FT就為CLO同Leveraged Loans呢個題目製作一名為The Debt Machine嘅系列，內容相當精采，極之值得大家細讀。以下我就會抄襲FT嘅內容黎講一講咩係CLO。
咩係CLO？
其實CLO同CDO係採用相同嘅證券化過程（Securitization），將債務「打包」成一種新嘅投資產品，唔同嘅係CLO基本上係CDO入面一個分類，專門打包借予企業嘅貸款。
故事嘅開端，就係QE政策下歐美投資市場長期陷於低息環境，投資者為求較高回報，就更願意向負債槓桿已高但又需要資金作如拼購之用嘅企業或Private Equity，借出貸款資金。呢類貸款被稱為Leveraged Loans（高槓桿貸款），企業住住會支付浮息黎吸引貸款人，令其係後低息週期更見吸引。
借出資金嘅嘅可以係銀行亦可以係對冲基金等。
- 不過喺CLO嘅故事中，銀行等貸款機構批出資金後，就將份貸款當成債券咁直接轉售俾投資銀行，投行再將大量買來嘅企業貸款打包而成一份證券，是為CLO。
值得留意係製作證券化嘅過程中時，同一批次嘅CLO係會按不同風險分層，即所謂Tranching。
- 當有貸款人士欠債唔還，就會由較高風險嘅「底層CLO」先承擔損失，因此「上層CLO」就比較安全，除非好多企業集體違約唔還，亦則持有「上層CLO」嘅人應該可長期收息。
同MBS與CDO係2008年嘅故事一樣，貸款一方因為預左會將唔會再將貸款放係自己個資產表上，所以批出貸款時有動機較為「求其」，所以對企業嘅信貸要求愈來愈低，對貸款者（即後來CLO持有人）嘅保障亦愈黎愈少，所以風險有上升之勢。
- 例如FT報道指，2016年有個新條例要求CLO嘅製作方最少要持有產品嘅5%，以確保其利益與投資者一致；但該條例不足兩年就被廢除。
不過，由於大部份CLO都係由專業投資機構如對冲基金持有，就算真係市況逆轉，都未必好似MBS或CDO等普及至零售層面時，對實體經濟帶來好直接嘅打擊。
- 另外，當年MBS及CDO促成嘅係樓市泡沬，泡沬爆破時居民直受損，但Leveraged Loan唔少係由具規模嘅企業借入，就算有泡沬對經濟嘅影響未有如樓市般直接。
目前較擔心嘅係Leveraged Loan及CLO市場崩潰可能對金融市場帶來系統性衝擊，令金融市場未能如常運作，繼而影響到實體經濟。
