2020財政預算案點評 | Econ記者Podcast with 曾國平

一個月前左右,曾國平(Byron)同我拍左條片話政府好應該係今次預算案派錢,結果我地成功爭取,所以即刻做條號外片,同係機場等緊搭飛機嘅Byron傾下佢有咩睇法!

仲有,今次預算案講到將會有成1300億港元財赤,創史上新高,又係咪咁得人驚呢? 睇下Byron 點睇 !

點解香港樓市未跌返去沙士價?| Econ記者 Podcast with 曾國平

武漢肺炎疫情係大陸未見好轉,不論對大陸經濟或者香港經濟都有明顯嘅打擊,但好奇怪嘅就係香港樓市並未有因此而大跌,如果按中原城市領先指數係二月第一個星期仲錄得微升。

曾國平(Byron,美國維珍尼亞理工大學經濟系副教授)就指出,其實所謂嘅「沙士價」係係自97金融風暴已來一直累積嘅「成果」。樓價2003年相對下跌幅有限,只係跌至多年「谷底」,配上後來嘅長期升勢,先至令大家「記憶猶新」。

再者,依家香港樓市因為早幾年嘅辣招所限,成交量一直較低。到經濟轉差時嘅短期反應就只係近乎完全凍結交投,而未係樓市急跌。 另一方面,Byron 以人口普查及金管局數字粗略估計,目前香港已供完層樓嘅比例遠高過沙士時,令當年「失業升、急沽樓、樓市跌、更多人沽樓」嘅惡性偱環,暫時未有出現。


Music Credit: – Bright Side by Evan Schaeffer

武漢肺炎拖垮大陸經濟嘅端倪 | Econ記者Podcast with 曾國平

武漢肺炎殺到黎,中國經濟無得避? 雖然話「傳染病學者都估唔到個疫情下一步係點,經濟學者又點會知呢?」,今集曾國平(Byron,美國維珍尼亞理工大學經濟系副教授)都試下用現有嘅證據,同大家分析下個疫情對大陸經濟嘅影響力。

首先係大陸股市新年假後開市首日嘅大跌,跌幅集中係製造業、重工業股,就可以反映湖北係呢一類供應鏈嘅重要角色。另外,國際油價都隨住疫情跌唔少,反映嘅好有機會係大陸嘅生產停頓,對能源需求急降。

呢啲都示意唔少中國公司至少會錄得短期虧損,咁跟住嘅問題就係有幾多大陸企會因此而資金流不足,出現違約等嘅金融問題? 而中央政府可唔可以出手救市? Byron 嘅回應就係「唔樂觀」……


Music Credit:
– Bright Side by Evan Schaeffer

武漢肺炎下香港好鬼大鑊 | Econ記者Podcast with 曾國平

明明兩個星期前,曾國平(Byron,維珍尼亞理工大學經濟系副教授)先講完香港經濟轉趨樂觀可以係今季反彈,可惜農曆新年一個武漢肺炎疫情大爆發,Byron依家覺得香港經濟今次好大鑊。

對於近日香港人搶購物資嘅情況,Byron直言「無法架喎」,一黎依家資訊傳播咁快,令大家集體反應速度遠高於以前,再者香港政府近期嘅防疫同幫助市民嘅表現極差,大家急住要自救都係合理嘅情緒……


Music Credit – Bright Side by Evan Schaeffer