膠事錄總裁講我知,瑞士喺今個月底又再一次進行公投,而今次嘅內容將會係退休金改革。瑞士已經係個香港人覺得社會保障極佳、極度宜居嘅國家,點解需要進行退休金改革呢?

瑞士現行的退休金制度同香港同為所謂嘅「三條柱式」(3 Pillar),係香港就係政府基本社會保障係一號柱,二號柱就係強積金,而三號柱就係個人儲蓄;喺瑞士嗰三條柱就有啲分別(始終瑞士係個福利制度更完善嘅國家?),三號柱仍然係私人儲蓄﹐但一號柱就國家退休金,呢個退休金係由僱主、僱員及政府三方一齊支付嘅,二號柱就係僱員自己供款嘅退休金,而僱員係強制需要為一號同二號柱供款,而僱主就強制要為一號柱供款。

所以係瑞士一個打工仔係會有兩份退休金,一份自己供(二號)、另一份政府同僱主同你一齊供;情況同香港得一個強積金好唔同。以下呢個圖表就可以顯示到平均而言,一個瑞士退休人士嘅「收入」來源,有約四成係黎自一號柱,亦即係全國退休金:

依家瑞士面對嘅問題,同好多其他地方一樣,係人口老化,令退休金制度較難維持。因為工作人口對老人家的比例,由半世紀前嘅大約5對1(即係可以有5個人養一個老人家),變成依家嘅3對1,並會持續下降。咁就會出現一個情況,就係愈來愈少人供錢入去個國家退休金(一號柱),但就愈來愈多人提取退休金養老。瑞士政府估算,到2025年退休金就會錄得30億瑞士法郎的赤字。

瑞士政府就提出一個名為「Old Age Security 2020」的改革方案,當中的改革建議包括將退休金的每年分發比率,由資產總值的6.8%,降至6%;換言之,如果退休金內嘅資產總額為10萬瑞郎,現時每年可以提取6800瑞郎,但之後就會降至6000瑞郎;但這改革只會影到2019年1月1日以前未達45歲嘅人士。

另一個改革建議,就係介乎35至54歳啲打工仔,佢地僱員自供嘅退休金供款比率會上調1%,而國家退休金嘅供款比率就會提高0.15%。

而為左補償新計劃嘅新增負擔,2019年起新提取退休金嘅人士可以獲得額外每月70瑞郎嘅補貼。另外,瑞士政府建議在2018年開始提高消費稅率0.3%,並將相關的收入放到國家退休金之中。

講返今次嘅公投,公投入面就有兩條問題嘅,第一條就係問居民支唔支持「Old Age Security 2020」的改革方案,另一條就係問支唔支持政府調高消費稅率。

總結:

呢個就係今次瑞士退休金公投嘅背景,同香港嘅討論完全係兩個唔同嘅星球。但當福利較好嘅地方都需要討論退休金制度改革時候,當地相關嘅討論其實可以對我地探討未來香港嘅老年保障,有更加好嘅視野同背景資料作參考嘅。

講係咁講啦,要可以好好應用呢堆資訊,確實係有需要觀察更多同今次改革有關嘅資料嘅。睇下我有無時間再處理,亦都睇下膠事錄會唔會有更多資訊提供。


參考資料: Can ‘Old Age Security 2020’ guarantee pensions?

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous article由媒體經濟學講到「點解香港咁多份親中報紙呢?」
Next article聯儲局縮減資產表 – 其實每個月縮幾多呢?
Econ記者網站新聞團隊(絕大部份時間其實得一個人主理)

留言區

This site uses Akismet to reduce spam. Learn how your comment data is processed.