Dot Plot
今晚嘅議息結果，係會同一年四次嘅聯儲局官員經濟預測報告一同發佈。除左經濟預測除左有官員對GDP、通脹及自然利率等嘅預測數字之後，亦有各聯儲局官員嘅未來利率走向預測，即係所謂嘅Dot Plot。
不過，近個幾月聯儲局大力推廣其「貨幣政策框架審視計劃」，而當中一個可能要改革嘅重點正係Dot Plot。例如上次嘅會議紀錄就顯示，有官員認為市場往往誤解左Dot Plot，以為Dot Plot係反映局內官員嘅利率政策共識，但實情只係將各個官員嘅利率預測放埋一齊，唔一定反映未來政策取態。
可以預期係今次會後記者會，主席Jay Powell會再次強調Dot Plot嘅本質，提醒市場唔好過度解讀。
停止減資產嘅計劃
目前聯儲局內部嘅共識係今年內停止縮減資產表規模，而上次會議中官員都示意希望可以係之後幾次會議後公佈計劃詳情，所以今次會議可能都會有進一步嘅資料披露。
雖然將局內各官員大致都認同銀行體系儲備水平，應該回落到1萬億美元左右就足夠，亦即係已經對所謂嘅Efficient Level of Reserve大致有定案，但有關縮表嘅細節仍有待確定。
一個問題係點處理手上嘅按揭債券，因為上次會議中官員已同意長遠而言資產表上應該只有美國國債，所以按揭債券係要全部「消滅」。問題係消滅方法，應該係直接向市場放售，定係慢慢等佢地到期？呢個上次未有定案。
另一個大問題，就係聯儲局手上嘅長短期美國國債分佈應該係點？由於QE嘅主要運作係央行買入年期較長嘅債券，壓低長綫利率黎刺激經濟，聯儲局手上嘅國債平均年期遠較以往為長，而手上更係無一年以下嘅國債。官員已經講明，有意增加短債持有額，但增持幾多？而同時又會減持幾多長債呢？呢啲都係目前聯儲局需要討論嘅重要題目。
