Monetarism中文常稱為貨幣主義,係一套流行於60至80年嘅宏觀經濟學思想。支持呢套想法嘅學者會強調MV = PY 呢條貨幣恆等式作為分析基礎。

M為貨幣供應,V為貨幣流通量,P為物價,而Y則為經濟總產量。MV=PY,就即係話貨幣供應嘅總流通次數,或者全個經濟嘅總支出,其實就等如NGDP(名義生產總值)。相同嘅邏輯之前係介紹Circular Flow of Income時都講過,以整個經濟體而言總開支必定等同總收入,因為一個人嘅開支就係另一個人嘅收入;總收入亦會等如總產量,因為收入就係售賣經濟產出嘅回報。

換言之MV=PY,兩者必需相等。


Monetarism學說使用MV=PY嘅恆等式時,一般會先加入V 相對穩定呢個假設;有左呢個假設我地就以推論到M嘅上升,將會帶動PY同步上升。

只要再加入經濟總產量長綫而言,只受生產力或生產要素供應嘅影響,不會隨貨幣因素改變嘅呢個Monetary Neutrality假設,咁就可以得出M嘅增長會同P嘅增長一致,亦即係貨幣供應增長(或減少)會令物價上升(或下降)嘅推論,或者係Quantity Theory of Money(QTM)

著名嘅Monetarist Milton Friedman就「Inflation is always and everywhere a monetary phenomenon」呢個名句黎總結以上推論。


另一個Monetarism嘅重心就係所謂嘅Money Illusion,即係話居民會受到貨幣供應改變帶來嘅物價變動所誤導。

例如當貨幣供應增加上升,消費者手上會多左現金而消費總額大左,商人會以為係消費者對佢出售嘅貨品需求多左,所以增長產量,但最終只會係整體物價上調;又例如工人嘅人工高左,佢會以為係因為佢嘅生產實質價值高左,所以佢嘅實質消費能力亦會高左,但事實係個個都加人工,而通脹又食返走名義上嘅人工升幅。

Money Illusion嘅推論係貨幣供應上升,可以帶黎短期嘅實質經濟刺激,例如上述嘅增產同增加消費嘅行為;但長綫而言,因為大眾適應左通脹,明白到唔係自己嘅收入高左,只係物價整體上升而水漲船高,咁個實質經濟刺激就會減退。


呢個Money Illusion加上QTM嘅推論,亦為Friedman係1968年American Economic Association年會上提出嘅Natural Rate of Unemployment理論嘅基礎。

由於短期之內通脹可以刺激經濟,反映就業同通脹關係嘅Phillips Curve理應可以係短綫右向上斜;但長期而言,因為居民消化左通脹預期,所以再推高通脹都只會帶來更高通脹,而非就業增長,換言之Phillips Curve 長綫會變成直綫一條,企係Natural Rate of Unemployment 之上


Monetarism理解到貨幣供應量對實體經濟能有短期影響,因此呢派嘅學者主張維持貨幣供應相對穩定,以令通脹率更為穩定及可以預期,以避免使用貨幣政策黎調整經濟,亦降低通脹波動帶來嘅經濟耗損。

例如Friedman就曾提倡貨幣供應增長,或應鎖定每年一個固定升幅(例如每年4%),以防止通脹率大幅波動。

不過,呢一個主張並無獲得主流學界接納,但「應盡量避免主動式貨幣政策」呢個廣義推論,就廣為學界採用。近二十幾年流行嘅通脹目標制度(Inflation Targeting),亦可算係Moetarism思想嘅延伸應用。


各位讀者亦可以參考Marginal Revolution University有關Monetarism嘅教學短片:

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous article聯儲局可以點樣干預Repo市場援救雷曼?
Next article歐元區可考慮針對式通脹目標制度?
Econ記者網站新聞團隊(絕大部份時間其實得一個人主理)

留言區

This site uses Akismet to reduce spam. Learn how your comment data is processed.