撰文:陸龜
尋日游公子係852度講（上面條片），話零售銷貨按年跌一成半，香港就快爆煲咁話。之不過一二月傳統上係農曆年，條數成日跳上又跳落，所以筆者特登搵返呢三年個農曆正月初一出黎：
2013年農曆年初一2月10日
2014年農曆年初一1月31日
2015年農曆年初一2月19日
而同呢條數有關嘅零售銷貨數據分別係：
零售銷貨量2014年1月比2013年同期升14.5%
零售銷貨量2015年1月比2014年同期跌14.6%
睇到未？兩年拉勻其實差唔多。本地零售銷貨停止上升係不爭嘅事實，遲早爆煲都係不爭嘅事實，不過大佬你望下農曆年影響先講野啦。
－－－－－－－－－－－－－－－－
之不過，睇分項都睇到有料到嘅~
呢度只睇銷貨值：
上面個排法大致係根據果類野個單價黎排，首先第一樣野最明顯見到係藥物及化妝品頖別上年升完今年唔跌，呢度睇到走水貨其實逆大趨勢升超過一成。另一樣好明顯嘅係燃料因為油價大跌所以跟住跌。唔計兩呢樣，可以見到最頂果四類貴價野都係跌得深過升而推晒落雜項耐用消費品，可見無論係自由行又好，市民都好對於大型消費轉趨謹慎而轉買細細件嘅野。唔計上面果幾樣其他全部野兩年拉勻都係得單位數升幅。
總結上面幾樣，可以睇到兩樣野：
1. 自由行個消費力收緊皮，少左買金買LV轉掃奶粉，更好嘅indicator 係澳門連續兩個月博彩收入按年跌近五成。
2. 消費轉趨審慎預示市民對前景展望轉差，即係咁，假如你想食雪糕，有錢果陣你可能會去一田度食 (計入百貨公司貨品)，你唔想使咁多錢你可能會去惠康買杯Dreyer’s 食(計入超級市場貨品)，再差啲你會去老麥度買杯朱古力新地食 (計入食品、酒類飲品及煙草)，到到真係好唔掂果陣你可能會選擇唔食。過程之中第一步係見到上游貨物零售轉差而中下檔仍然升緊，香港宜家大約就係呢個情況。
睇到呢度，你可能大約估到點解品客會對中產減咁多稅。
－－－－－－－－－－－－－－－－
