除非今晚有突破性發展,未來兩日財經世界的走勢都會被Debt Ceiling (債務上限)呢件事左右。(當然,意大利貝老的同黨集體辭職都會左右大市啦,不過重心都係美帝會唔會違約呢件事)。各大「財經」版都在過去一星期對Debt ceiling有適量的報道,不過由於版位有限,加上美國的政治好複雜及事情發展得好急 (當然重有寫手的「我寫得詳,讀者都唔會明啦」的心態),令大部份報道都係集中於個別大事件上。 本著網上版位無限,你鐘意睇就睇,唔睇就算數的心態,我就大膽從美國的媒體為大家整合一下報道,等大家睇得明D。

首先,基本知識,美國國會分成House (眾議院) 同Senate (參議院)兩部份,House就由共和黨控制﹐Senate就由民主黨控制,形成政治兩極化 (polarization)的形勢。由於提高Debt Ceiling的法案需要係House及Senate同獲通過才可以執行,亦由於美國政府的財政年度會係10月1日開始,無法提高Debt ceiling新朌財年就唔會有錢俾政府繼續運作,政府會先在10月1日開始出現所謂Shutdown 的情況,而財政部亦預計,到左10月7日,就會可能出現美國無力還債的情況

因此共和黨就把握機會,利用「美國政府Shutdown 同違約」作為「人質」,希望迫奧巴馬同民主黨放棄它們近年的重要政績﹣﹣﹣Obamacare (醫改法案)。奧巴馬一直姿態強硬,多次重申唔會同共和黨談判,並強調唔應該用美國政府的信用作為談判籌碼。不過共和黨就當然唔理佢,(House  Speaker John Boehner重整左條片,諷刺奧巴馬寧願同普京談判都唔同佢地談判,如下)係21日House 就通過左一個提高Debt Ceiling的法案,但當然包含停止對Obamacare撥款的條款。

當House通過左個法案,就會交俾Senate討論。由於Senate係由民主黨控制,當然唔會俾Obamacare停止撥款呢類條款出現啦。雖然共和黨明白呢個事實,但為左令事情更具戲劇性同吸引更多美國人留意,共和黨就出動佢地係Senate反對Obamacare的代表Ted Cruz議員發動「拉布」,一個棟左係度講足21個鐘零19分鐘(當中有不少精彩地方,例如朗頌下Dr. Seuss呢本兒童故事,如下)。


(上圖呢兩個係Ted Cruz個女,聽緊佢係度朗頌Dr.Seuss)

 

但最後,Senate係美國時間星期五下午,通過左一個新的提高Debt Ceiling 法案,內容梗係無左停止向Obamacare撥款呢件事啦。修改過嘅法案,就會發還House重議。

而最新消息就係,共和黨提出左一個「讓步方案」,將停止向Obamacare撥款的條款,改為延遲推行Obamacare一年。呢個新嘅法案已經係美國時間星期日清晨通過左,預期星期一就會番去Senate再議。

不過,民主黨係Senate嘅代表一早就講明,唔會通過任何延遲推行Obamacare嘅法案,好大機會係星期一Senate會再修訂法案,將佢變番完全唔影響Obamacare的版本,再發回House。由於星期一已經係30日,係咁發來發去會浪費唔少時間,可唔可以趕係10月1日呢個死線前過到,真係好睇兩黨點玩落去。

我唔係財演,唔打算做預估,但希望大家可以明白呢件事發展多少少。

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous article自由行救左我地?
Next article股市話俾曼聯迷知,驚都唔洗驚!
Econ記者網站新聞團隊(絕大部份時間其實得一個人主理)

留言區

This site uses Akismet to reduce spam. Learn how your comment data is processed.